AMC by election ah hnehna kan chang ngei dawn: Lalrinenga Sailo

by News Editor

Tualchhung News

ZORAM TODAY| 21st June, 2024 (Fri): Vawiin khan dan pangaiin MNF chuan Mizo Hnam Run-ah chhung inkhawm an nei a, Lalrinenga Sailo, AMC Mayor leh MNF Adviser ni bawk chuan thusawiin, AMC Ward No XIX By-Election lo awm tur atan hian MNF te kan chak ngei dawna an rin avangin ZPM in min huphurh lawk hle a ni a ti.

Lalrinenga Sailo chuan, AMC Ward No XIX By-Election-a MNF Candidate Dr Lalrinzuali Hrahsel hi campaign a feh chhuah tawhnaah mipuite pawn an ngainat rawn hle a, kan campaign tawhna ah mipuite ah kan boruak pawh a tha hle a ni, a ti a, an candidate chungah rinna sang tak ward mipuiten an neih belh leh chakna chan ngei a beisei thu a sawi bawk.

AMC Mayor chuan, khawvel a changkang chho zel a,Technology-ah kan sang tawlh tawlh a, social media in min chenchilhin tun hma a chanchinbu hmanga thuthar kan hriat thin aia chakin Social Media-in min lo awp bet ta, a ti a. Social media mipuite pawhin kan hman thiam a tul thu sawiin, thudik leh dik lo post kawngah finfiah hmasak a tul thu a sawi bawk.

"AMC hmalakna pawh ZPM ten nasa takin thu diklo tluantlinglo hmangin an theh darh nasa a, Mipuite pawhin thudik hriat kawngah ngaihtuahna fim hman nachang kan hriat zel a pawimawh takzet a ni" a ti.

Lalrinenga Sailo chuan MNF hian kalphung fel leh tha tak kan nei a, hmalam panin kal zel dawn a, MNF hi kum 22nd October, 1961 khan din niin, Kum 62 leh Thla 8 kan hmang tawh a, Silver Jubilee leh Dimond Jubilee hmang tawhin, kan hma lawkah Platinum Jubilee hmang turin kan inruahman mek a ni. Chuvangin MNF party chu 'Pathian leh kan ram tan' tia kal zel tur kan nih angin kan kal zel dawn a, Pathian leh mipuite zarah Sorkarna changin kan la ding chhuak leh ngei dawn a ni a ti bawk.

He hun hi Gogo Lalremtluanga, Gen. Secretary MNF Gen. Hqrs. chuan kaihruaiin, TC Kaphmingthanga Gen. Secretary, MNF hnen atangin By Election lo awm tura an hmalak tawh dan report a pe bawk.